Энэхүү нийтлэлийг 2012 оны 4 сард бичсэн болно. / Архив /

Манайд хэвлэх үйлдвэр олон болж брошур буюу танилцуулгыг өнгө дизайны өргөн сонголттой, чанарын өндөр түвшинд хэвлэж байна. Брошурыг ихэвчилэн 128-аас 157 граммын шохойтой цаасан дээр хэвлэх нь түгээмэл үзэгдэл. Барилгын компаниудын орон сууцны захиалгыг танилцуулгагүйгээр төсөөлөхийн аргагүй билээ.

Миний бие 3 жилийн хугацаанд шинэ орон сууц захиалагч компанийн 200 гаруй танилцуулга цуглуулжээ. Хобби гэхэд хаашаа юм. Үүн дээрээ үндэслэж та бүхэнтэй брошурын талаар санал бодлоо хуваалцаж байна. Тухайн компанийн брошур ямар байх нь маркетингийн албатай шууд холбоотой ч нөгөө талаас барилгын компанийн том жижгээс хамаарч байх шиг. Зарим нэгэн томоохон компаниуд грамм өндөртэй цаасан дээр гадаадад хэвлүүлэн авчруулж байхад, арай жижигхэн газрууд А4 цаасан дээр принтерлэж байх жишээтэй.

Манай барилгын компаниуд өөрийн гэсэн өнгөний сонголтыг танилцуулга дээрээ хэвшмэл болгон хадгалж байна. Ж:нь Инэл ХХК хүрэн , Аман хуур хотхон улбар шар, Цэлмэг ази ХХК цайвар цэнхэр, Заг ХХК хөх , Номин констракшн ХХК шар, Макс өргөө ХХК цэнхэр, Жигүүр гранд цайвар гэх мэтчилэн байна. Брошур буюу танилцуулгаас иргэд хамгийн түрүүн ямар мэдээлэл олж авахыг хүсдэг вэ? Энэ асуултад би эргэлзээгүйгээр хаанахын ямар компанийн барилга вэ? гэдгийг танилцуулгаас олж харахыг хүснэ гэдэгт итгэлтэй байна. Сайн ярих юм бол захиалагч, гүйцэтгэгчээ хүртэл тавих хэрэгтэй. Үүнийг брошур дээрээ тавьсан цөөхөн компаниуд байсан бөгөөд

Түмэн наст хотхон Захиалагч: Бэрэн мортгейж групп ХХК , Гүйцэтгэгч: Бэрэн констракшн энд автомэшн ХХК

Да хүрээ хотхон Захиалагч: Мануул Трэйвэл ХХК, Гүйцэтгэгч : IPW LLC

HAPPY HOME Хөрөнгө оруулагч: Депро Монгол ХХК, Захиалагч: Таманука ХХК газрууд байна.

Сүүлийн үед компаниуд орон сууцны цогцолбор болон хотхоны нэрээр нэрлэгддэг болсон. Яг энэ шигээ компанийн нэрээ брошур дээр тавиагүй газруудын танилцуулгаас дурдвал, Рапид харш хороолол, Тайж орон сууц, Хөх морьт спорт амралтын цогцолбор, Номноо хотхон, jobi 72, Өнөр бүл хотхон, Монгол хотхон, Саруул тэнгэр цогцолбор гэх мэт. Харин ямар ч компани болон хороолол цогцолборын нэр тавиагүй зөвхөн захиалга авах орон сууцныхаа тоогоо бичсэн газар бол Ванхүү ХХК гэх компани байлаа.

Бүх л компаниуд танилцуулга дээрээ МАНАЙ ДАВУУ ТАЛ гэж бичиж байгаа. Давуу тал гэж юу вэ? Бусад барилгын компаниудын барилгаас юугаар онцлог давуу талтайг нэрлэхийг хэлэх байх. Тэрнээс биш ямар ч ISO стандартгүй Вакуум цонх, паркетан шалтай гэж бичвэл үнэхээрийн онигоо шүү. Мөн ихэнх барилгын компаниуд байршлаа хотын А зэрэглэл гэж бичих юм. Бүх л дүүргүүдийг А зэрэглэл гэх юм бол хөдөө орон нутаг В зэрэглэл болох юм уу хаашаа юм. Дараачийн онцлох асуудал бол газар хөдлөлтийн тэсвэр. Компаниуд танилцуулга дээрээ 7-8 баллын хооронд гэж бичсэн байдаг. Тэгвэл Хурд групп APARTMENT бүрэн цутгамал орон сууцандаа 7.5 гэсэн баталгаа өгч байгаа бол РАПИД ХАРШ төмөр бетон хийцтэй орон сууцаа 8 баллын тэсвэртэй гэж бичжээ. Газар хөдлөлтийн тэсвэрийг 0.5 - аар зөрүү гарган бичиж байхад хамаагүй тоо тавьж болохгүй шиг ээ. Манай давуу талын бичвэрүүдийг цааш нь дурдах юм бол. Домофон систем, галын дохиололтой, Цэвэр тохилог орчин, Дулаан гражтай, Айл бүр телефон утас, кабелийн телевиз, интернетийн үзүүртэй гэх мэтчилэн. Эдгээр нь орон сууц худалдан авагчдыг өдөр тутам хангаж байх зайлшгүй наад захын хэрэгцээ шүү дээ. 10 жилийн өмнө компанийн танилцуулга дээр энэ мэтчилэн зүйл бичигдсэн байсан бол арай өөрөөр хүлээж авах байсан.

Миний бодлоор давуу тал гэдэг нь Сити Палас ХХК -ийн танилцуулга дээр бичсэн -Нийтийн эзэмшлийн 2100 мкв талбай бүхий ил зогсоол, хүүхдийн тоглоомын талбайтай гэж тодотгож өгснийг хэлэх байх гэж бодож байна. Барилгын компаниуд давуу тал гэдэгтээ барилгын хийц, орчин, төлбөрийн нөхцөл зэргээ бүгдийг нь нэг дор бичсэн байдаг. Танилцуулгуудаас надад MTD констракшн ХХК-ийн брошур таалагдсан. Бидний тухай, Бүтээн байгуулалт , Барилгын хийц гэж салгаж тодотгож өгсөн байна лээ. Ер нь компаниуд танилцуулга дээрээ Манай давуу тал гэж бичихээс илүүтэйгээр Барилгын хийц гэж оруулбал зүгээр юм шиг санагдаж байна. Бид чанарыг чухалчлах хэрэгтэй.

Орон сууц худалдан авах боломжийг иргэдэд сонголттой гаргаж өгсөн танилцуулгаар ЭКО констракшн ХХК байв. Үүнд:

1-р нөхцөл. Засгийн газраас хэрэгжүүлж байгаа 100 мянган айлын ОРОН СУУЦ-ны зээл авах гэж байгаа бол урьдчилгаа 10%-ийг төлөөд 50 сая хүртэлх төгрөгийг жилийн 6% хүүтэй

1-20 жил хүртэлх хугацаатай зээлд хамрагдах боломжийг танд олгож байна.

2-р нөхцөл. Хэрэв та төрийн албан хаагч бол зээлийн эрхээ авснаар Монгол Улсын Засгийн газрын хэрэгжүүлэгч агентлаг ОССК –ийн 8% хүүтэй 20 жилийн хугацаатай зээл авах боломжтой.

3-р нөхцөл. Урьдчилгаа 30-40% төлөөд 1.45% хүүтэй, 40-өөс дээш хувийг төлөөд 1.4% -ийн хүүтэй Монголын хамгийн ууган банк болох ХХБ –ны 1-15 жил хүртэлх хугацаатай зээлэд хамрагдах боломжтой.

4-р нөхцөл / Та бэлнээр төлөх бол / Урьдчилгаа 20-30%-ийг төлөөд гэрээ байгуулан ашиглалтад орох хугацаанд графикийн дагуу төлөх боломжтой гэжээ.

Мөн Бармон ХХК танилцуулга дээрээ 1км орчмын судалгаа гаргасан байсан. Энэ нь аль ч танилцуулга дээр байдаггүй шинэлэг зүйл байв.

• Үзвэр үйлчилгээний төв.
• Өргөө кинотеатр 900м
• BSB дэлгүүр 700м
• Авто засвар 300м
• Миний зах 350 м
• Бенз Ауди сэрвис 170 м
• Угаалга гарааж 30 м
• Гарааж 300 м
• Гэмтлийн эмнэлэг 800 м
• Дүүхээ / Шонхор төв/ 450 м
• Баянгол зах 450 м
• Хороололын эцсийн автобусны буудал 460 м
• Сургууль цэцэрлэг
• 54-р сургууль 50 м
• 77-р сургууль 400 м
• 78-р сургууль 300 м
• 93-р сургууль / гоц авьяастны / 200 м
• 95-р цэцэрлэг 170 м
• 94-р цэцэрлэг 320 м
• Төрийн байгууллага
• 7-р хороо болон цагдаа 250 м
• 8-р хороо болон цагдаа 350 м
• Өрхийн эмнэлэг 8-р хороо 350 м
• Өрхийн эмнэлэг 7-р хороо 230 м
• Нийгмийн халамж үйлчилгээний төв 100 м гэж тодотгож өгчээ.

Харин танилцуулга дээрээ өрөөний мкв-ийг нэг бүрчилэн гаргасан газруудаас Жигүүр гранд групп, Пума констракшн ХХК, Интерсант ХХК, Шинэ дөл ХХК, Тэдмэнт ХХК, Бэрэн мортгейж ХХК, The one residence, River hills town байлаа . Харин Жигүүр гранд группын аль ч танилцуулга дээрээс та талбайн тооцох аргачлалыг харах боломжтой. Ж:нь ZAISAN VILLAGE –ийн танилцуулга

• “Г” айл Өрөөний тодорхойлолт
• Коридор 5.16
• Коридор 8.57
• Унтлагын өрөө 1 20.21
• Унтлагын өрөө 2 20.21
• Зочны өрөө, гал тогоо 50.03
• Агуулах 4.10
• Ариун цэврийн өрөө 5.80
• Зочны ариун цэврийн өрөө 2.25
• Тагт /30% / 2.09

Нийт 118.42 мкв. Талбай тооцох аргачлалыг тагтанд нарийн гаргасан байгаа юм. Бас нэг санаа авчихмаар зүйл нь Макс өргөө ХХК нь Elegance town хотхондоо “Өөрөөр сэтгэж, өөдрөг амьдарцгаая ” гэсэн уриалга гаргаж бичсэн. Чихэнд чимэгтэй, сэтгэлд хоногшмоор дажгүй л үг. Компанийнхаа танилцуулгыг брошур төдийхнээр биш бүхэл бүтэн сэтгүүл гаргадаг газар бол яахын аргагүй Их үйлсийн эрэлд ХХК. Хийсэн зүйлтэй, хэлэх үгтэй болохоор арга ч үгүй юм уу даа.

Барилгын компаниудын орхигдуулаад байдаг зүйлийн нэг утасны дугаар. Брошур дээрээ ажилд авсан хүнийхээ утасны дугаарыг тавьдаг. Нөгөө хүн нь сар ч болоогүй ажлаасаа гардаг. Утасдахаар би ажлаас гарсан мэдэхгүй ээ л гэдэг. Хайран захиалга, хайран мөнгө байна даа. Эцэст нь дүгнэхэд надад хамгийн их таалагдсан брошураас MОGULTOWN-ний танилцуулга байлаа. Бусад компаниуд шиг интернет болон кабелийн оролттой гэж бичсэнгүй. Танилцуулга дээрээс нь зарим нэгэн зүйлийг онцлоход Ж: нь

СПОРТ ЦОГЦОЛБОР

800 мкв талбайд баригдах “ Спорт цогцолбор” нь танд болон таны гэр бүлд амралт чөлөөт цагаа зөв боловсон өнгөрүүлж, дуртай спортын төрлөөрөө хичээллэх бололцоог олгоно. .......,

ТОГЛООМЫН ТАЛБАЙ

Хотхоны гадна тохижилтын салшгүй хэсэгт тооцогдох төрөл бүрийн тоглоомын талбайнуудыг шийдэж өгсөн.

• Мини гольфийн талбай
• Сагсан бөмбөгийн талбай
• Газрын теннисийн талбай
• Хүүхдийн тоглоомын талбай

ЦЭЦЭРЛЭГТ ХҮРЭЭЛЭН

• Зүлэгжүүлэх талбай 9307 мкв
• Явган хүний зам талбай 1841.3 мкв
• Байгалийн чулуу 10 мкв
• Нарс 2,0-3,0 м 265 ш
• Нохойн хошуу 2892 ш ....., гэх мэт
• ХИЙМЭЛ НУУР 388 мкв.

Мөн өрөөний мкв хэмжилтийг нарийн гаргасан байлаа. Өрөөний НИЙТ ТАЛБАЙ 103.25 мкв . Үүнээс ЗАРАГДАХ ТАЛБАЙ нь 100.53 мкв . Үүнд өрөөний доторх талбай тооцох аргачлал стандарт хэргэлсэн байна. Харин зайлшгүй байх ёстой нэг зүйлийг орхигдуулсан нь Барилга баригдах байршлын схем бүдүүвч зураг орхигдуулсан тал байлаа.

Барилга гэдэг том нэрийн дор захирлаас харуул хүртэл хоёргүй сэтгэлээр хөдөлмөрлөж яваа та бүхэндээ амжилт хүсэе. Миний энэхүү нийтлэлээс хэрэгтэйг нь аваад хэрэггүйг нь хаяна биз ээ.